عزيزتى الجميلة حواء
لو خلاص قريفتى من جوزك ومش عايزاه
لو مبقيتيش طايقة وجوده ف البيت
لا تقلقى
فعليك باتباع الخطوات البسيطة التالية لتطفيش اى راجل من اى حته
اول مايدخل عليكى من الباب مفيش غير :انت كنت فين او اتاخرت كده ليه او ايه ده انت مجبتش البيض والفينو !!!
ومش عايزة أقولك لازم يبقى غضب الله نازل على وشك.
حاولى ماتسرحيش شعرك كتير ومفيش داعى للمكياج والبرفانات وشغل العالم الفرافيرى دى
ماله الصابون ابو ريحه
امه بقى عايزاكى تبقى حطاها على دماغك وزاعقة واتلككى على اد ماتقدرى يعنى كل زيارة ليها تبقى راجعه بخناقة
وبلاش بقى ياحبيبتى الهدوم الشفتشى والمشمشى والبيبى دول والمش عارفة ايه خليكى ف الجلالايب الكم
انتى عايزاه يقول عليكى ايه ؟؟ اتجوزتى وانحرفتى ؟؟
خليكى باحترامك الكامل والضلمة ياما بتستر
وطبعا ماتدلقيش عليه وياحبيبى وياكوكو وبودى بودى وكوتى كوتى والكلام الفاضى ده ايوه خليكى جد كدهوياريت تبقى ضاربة بوز محترم بسبب ومن غير سبب
ولو عندك عيال ياريت تسيبيهم عليه كده على طول وبالذات وهو نايم
ده الاطفال احباب الله وبالذات لما حد بيبقى نايم وياريت تلبسيهم احقر حاجة عندهم ولا انتى عايزاهم يتحسدوا؟؟؟
وماوصيكيش بقى على مصروف البيت عايزاكى تفرتكيه ف كله فى اقل من 48 ساعه او اقل المهم يعنى على حاجات هايفة انتى وشطارتك .
اما بيتك ده فسيبك من خالص لما يبقى يجيلك مزاجك ابقى اعمليه وياسلام بقى لو ف زرار قميص واقع
طنشى الموضوع خالص ولا كانك شايفه لازم يقولك عليه 115 مرة الاول بعدين تفكرى ف الموضوع .
كل شوية تعايريه بفقر اهله يعنى مثلا : دى هبه بنت خالتى جوزها جابلها عربية فى عيد ميلادها
ياعينى عليا الا مادخلت عليا بعود بقدونس ف عيد ميلادى .
ومتنسيش وهو بياكل تفكريه بفاتورة الميه والكهربا والتليفون .
كل ما يقولك لا على اى حاجة اقعدى زنى على دماغه لحد مايصدع وينهار ويوافق .
كل ماتيجى تخرجى معاه البسى اقدم حاجة عندك ويبقى شكلك كده زى ماتكونى صاحية من النوم
بس لو خارجة لوحدك اتشيكى بقى والبسى اللى ع الحبل والحبل نفسه
واخيرا عزيزتى حواء لو جوزك ماطفشى بعد كل ده يبقى حاجة من الاتنين
ياما كفيف
ياما هو متجوز عليكى من زمان
الإثنين يوليو 16, 2012 1:10 am من طرف 
موضوع: كيف تخسرين زوجك فى عدة خطوات بسيطة ؟؟؟ 
