السلام عليكم ورحمة الله وبركاته
علشان أطفالنا مهمين عندنا، بنحرص دايمًا إننا نجدد في الأكلات اللي بنقدمها لهم، ويبقوا مستمتعين بكل حاجة بياكلوها، هنقدم لكم طريقة جديدة لتقديم البطاطس هتعجب كل أطفالنا؛ عبارة عن بطاطس مقلية بالجبن، جرّبوها وقولوا لنا رأيكم فيها.
بطاطس مقلية بالجبنة
المقادير: 3 حبات بطاطس مسلوقة كوب جبن رومي مبشور ملعقة كبيرة كركم شرايح بسطرمة ملعقة كبيرة زبدة كوب زيت ملح وفلفل
الطريقة:
1- قطعي البطاطس شرايح عريضة، وتبّليها بالملح والفلفل والكركم، وممكن تحطي زعتر لو عايزة.
2- حطي الزيت مع الزبدة، وحمّري البطاطس فيهم؛ علشان الزبدة تخلي البطاطس طرية من جوه، ولما يبقى لونها دهبي ارفعيها وصفّيها من الزيت.
3- رصي البطاطس في صينية على أد الكمية اللي عملتيها، وبعدين حطي على كل شريحة من البطاطس شريحة بسطرمة، أو ممكن لحمة مدخنة أو رومي مدخن، وبعدين حطي على كل شريحة كمية من الجبنة المبشورة.
4- حطي طبقة تانية من البطاطس المقلية على كل شريحة، وعليها كمية من الجبنة المبشورة، ودخّليها تحت الشواية علشان الجبنة تسيح.
5- رصّي شرايح البطاطس في طبق التقديم، وممكن ترصّي معاها شرايح من الخس أو الطماطم، وزيّنيها بالزعتر وقدّميها.. بالهنا والشفا.
الإثنين يوليو 16, 2012 1:10 am من طرف 
موضوع: بطاطس مقلية بالجبنة أكلة سهلة لكل أطفالنا 
